Zaindu lagunok

marzo 2, 2012

Nola esan, nola adierazi… Eskerrik asko. Thanks. Merci. Gracias. Bira amaiera polita, Kursaalekoa. Berotasun handia sentitu genuen eta horrek indar handia eman digu. Zaindu lagunok. Izango duzue gure berri!

Argazkia: Oscar Alonso.


Gorka Urbizu eta Toño Muro arituko dira gurekin Kursaalen

febrero 28, 2012

“Don Inorrez” (Gaztelupeko Hotsak) diskoarekin hainbat kontzertu eskaini ditugu. Eta Bide Ertzean barrena, inoiz baino gonbidatu gehiago izango ditugu bidelagun. Hatortxu Rock-en, esate baterako, bost lagun igo ziren gurekin kantatzera: Xabaltx, Naroa Gaintza, Aritz Deabruak, Gorka Urbizu (BTX) eta Toño Muro (Balerdi Balerdi).

Ostegun honetan, martxoak 1, amaituko da “Don Inorrez” bira Donostiako Kursaalen. Eta ohar honen bidez, nobedade bat iragarri nahi genuke: Kursaalen, birako azken kontzertuan, bi gonbidatu berezi arituko direla gurekin batera taula gainean. Gorka Urbizu kantaria eta Balerdi Balerdi taldeko Toño Muro kantaria.

Laster arte, lagunok!

BIDE ERTZEAN DON INORREZ, “THE LAST SHOW”
MARTXOAK 1 OSTEGUNA, 20:00 Kursaal Donostia
SARRERAK / Tickets:
Kursaal lehiatilan: 17:00-20:00.
Victoria Eugeniako salmenta puntuan: 11:30-13:30 / 17:00-20:00.
Internet: http://www.kutxa.net
Telekutxa: 943 00 12 00.


Don Inorrezi gero arte esateko garaia

febrero 15, 2012

Aurreko post batean genioenez, berezia izango da “Don Inorrez” birako azken kontzertua. Martxoaren 1ean osteguna, Bide Ertzeanekin Donostiako Kursaalen eskainiko duguna. Tira, ba berezitasun hori argudiatu asmoz edo, atzera begira jarriko gara une batez.

Zuzeneko diskoen ondorengo diskoek ez dute bide erraza izaten. Salbuespenak salbuespen, zuzeneko diskoak abesti ezagunen konpilazioak izaten baitira. Edota bira arrakastatsuen erakusgarri. “Don Inorrez” diskoa plazaratu genuenean, 2010eko irailaren erdialdean, kezka hori bera genuen. “Leidor Sessions” zuzeneko diskoaren oihartzuna oraindik nahikoa ozena baitzen (urtebete lehenago, 2009an plazaratua izan zen).
Gainera, “Don Inorrez” diskoan ez da “Leidor Sessions” zuzeneko grabazioaren arrabots hori, energia hori ageri. Bestelakoa da Hondartzan, Bost egun eman, Zurekin dantzatu nahi nuke edota San Josera bidean abestiek dakarten airea. Soka-orkestraren presentzia isila. Soiltasunaren indarra. Gutxirekin dena esateko gogoa.

Uste horrekin abiatu ginen, beraz, 2010eko udazkenean: “Don Inorrez” diskoa han eta hemen defendatzeko gogoz. Bide Ertzean ez da sekula arrakastaren harian ibili den talde bat izan. Bestelakoak izan dira gure kantuen ibilerak. Esan beharrik ez da. 1998tik hona, ordea, ibilbide bat osatzen joan gara. Batzuetan zuzen, besteetan oker. Baina bide horri jarraituz, orain arte arrotzak zitzaizkigun plazetara iritsi gara. Eta kasualitatea edo ez, baina “Don Inorrez” diskoarekin batera ailegatu zaigu Hatortxu Rock festibalean (Atarrabian) edota Donostiako Victoria Eugenia Antzokian nahiz Kursaalen jotzeko aukera. Bartzelonan nahiz Londonen aritzeko tenorea.

“Don Inorrez” biratxoa, bistan denez, oparoa eta ederra izan da. Azken urteotan hain ondo zaindu gaituzten tokietara itzultzeaz gain, toki berrietara eraman gaituelako. Baina Don Inorrezi gero arte esateko ordua iritsi dela uste dugu. Burua arindu eta ideia berriei ateak irekitzeko premia dugu. Beraz, urte eta erdi honetan batetik bestera ibili ondoren, biratxo honen azken geltokia Donostiako Gros partean iragarria dago. Gustu baduzue, Kursaalen ikusiko dugu elkar.


Sarrerak eskuratzeko gida modukoa

febrero 9, 2012

Don Inorrez ikusi dugu, Kursaal aldera bidean, antxeta rafaga batek akribilatua

Hiru aste geratzen dira. Hiru baino ez. Don Inorrez biratxoari amaiera emango diogu hiru aste barru, martxoaren 1ean osteguna, Donostiako Kursaalen. 2010eko irailean Bide Ertzeanen diskoak argia ikusi zuenetik hona, asko izan dira bizipenak, han eta hemen eskaini ditugun saioak. Denak izan dira bereziak, denak izan dira diferenteak. Eta Donostiako hau, Kursaalekoa ere, berezia izango da. Diferentea. Halabeharrez. Garai bat itxiko baitugu.
Sarrerarik eskuratu nahi bazenuke, hemen gida modukoa.

Kursaalen ere, zuekin dantzatu nahi genuke lagunok, laster arte!

DON INORREZ, “THE LAST SHOW”
MARTXOAK 1 OSTEGUNA, 20:00 Kursaal Donostia

Sarrerak eskuratzeko:
Kursaaleko leihatilan: Kontzertu edo ikuskizunen bat dagoen egun guztietan (17:00-20:00).
Victoria Eugenia leihatilan: Egunero (11:30-13:30 / 17:00-20:00)
Internet: http://www.kutxa.net
Telekutxa: 943 00 12 00.


PD. Hainbatek esan digute, arazoak dituztela sarrerak Internetez erosteko. Akaso, automatikoki agertzen diren lehiatilak blokeatuta izango dituzue zuen nabigatzailean.


Hilabete eskas falta da

enero 31, 2012

Don Inorrez birari amaiera emateko hilabete eskas falta da.
Blog honetan aspaldi iragarri genuen moduan, Donostiako Kursaalen izango da azken saioa. Despedidea. Horrek ez du esan nahi Bide Ertzean taldearen ibilbidea amaitzera doanik. Ezta gutxiagorik ere.
Ideia berriei heltzeko irrikitan gaude. Baina lehenik eta behin, 2010eko irailean abiatu genuen abenturari amaiera polit bat eman nahi genioke: martxoaren 1ean osteguna, 20:00etan Kursaal aretoan. Sarrerak dagoeneko salgai: www.kutxa.net

Hilabete eskas falta den honetan, atzera begira jarri gara eta, tira, pausaleku batzuk izan ditu gure biratxoak. Orain arte arrotzak zitzaizkigun plaza batzuetan jotzeko aukera paregabea izan dugu; eta aurretik ere bisitatu izan ditugun hainbat tokietara itzultzeko deia jaso dugu.

Batzuetan eta besteetan, Don Inorrez diskoa izan da errepertorioko zutabe nagusia. Ez bakarra, aurreko diskoetako kantuentzat tarterik ere izan baita. Despedidean, Kursaalen ere hala izango da.

“Itsasoa hemen non dago?” kantuz galdetzen digu Don Inorrezek. Ba itsasoratzeko toki ederra topatu diogu, Donostian, Zurriolako hondartzaren aldamenean dagoen Kursaal auditorioan.

Esan beharrik ez da. Martxoaren 1ekoa ez da beste emanaldi bat gehiago izango. Birako azkena baizik. Horrek suposatzen duen guztiarekin.

Don Inorrez biratxoa, 2010-2012

2010.IX.28. Donostia. Fnac. Diskoaren aurkezpena.

2010.X.28. Gasteiz. Elkar. Showcase/akustikoa.
2010.XI.10. Baiona. Elkar. Showcase/akustikoa.
2010.XI.17. Iruñea. Elkar. Showcase/akustikoa.
2010.XI.25. Bilbo. Fnac. Showcase/akustikoa.

2010.XI.29.
Gasteiz. Luis Aranburu aretoa.

2010.XII.07.
Durango. Plateruena Kafe Antzokia.

2010.XII.10.
Bermeo. Kafe Antzokia.

2010.XII.11.
Bartzelona. Euskal Etxea.

2010.XII.16.
Donostia. Victoria Eugenia Antzokia.

2011.I.22.
London, UK. Oxford House.

2011.I.28.
Azpeitia. San Agustin kulturgunea.

2011.II.5.
Markina-Xemein. Uhagon kulturgunea.

2011.III.11.
Lakuntza. Sorgiñak.

2011.III.25.
Sopela. Kurtzio Kultur Etxea.

2011.V.26.
Bilbo. Kafe Antzokia.

2011.V.27.
Irun. Amaia Antzokia.

22011.V.28.
Iruñea. Onki Xin.

2011.VI.09.
Iruñea. Erraldoien Txokoa.

2011.VI.10.
Larrabetzu. Hori bai gaztetxea.

2011.VIII.1.
Zuhatzu-Kuartango. Igerilekua.

2011.IX.4.
Berriozar. Bizkargain Plaza.

2011.IX.16.
Tolosa. Topic aretoa.

2011.XI.5.
Gaztelu. Kultur Astea.

2011.XI.25.
Bera. Kataku.

2011.XII.2.
Eskoriatza. Plaza.

2012.I.6.
Atarrabia. Hatortxu Rock.

2012.I.7.
Andoain. Bastero kulturgunea.

2012.I.8.
Elgeta. Espaloia Kafe Antzokia.

2012.I.13.
Eibar. Coliseo antzokia.

2012.III.1.
Donostia. Kursaal. Last show. 20:00h.


Don Inorrez diskoaren despedidea…

enero 17, 2012

Aupa lagunok! Gogotsu hasi dugu urtea. Agindu bezala, oholtza gainean. Mezu honetako lehen lerroak, beraz, Hatortxu Rock, Andoaingo Bastero, Elgetako Espaloia Kafe Antzokia eta Eibarreko Coliseum antzokira gu ikustera hurbildu diren guztientzat. Eta bide batez, zuzenean ala zeharka, emanaldi horiek antolatzen lanean aritu diren guztiei.

2010eko irailean aurkeztu genuen Bide Ertzean taldearekin Don Inorrez diskoa. Geroztik, hainbat emanaldi eskaini ditugu. Lan honi esker, orain arte arrotzak zitzaizkigun plazetan aritzeko aukera izan dugu eta, nola ez, biziki maite ditugun aretoetara itzultzeko bidea ere eman digu Don Inorrezek. Urte eta erdiz errepertorio hau defendatu ondoren, bira honi amaiera emateko tenorea iritsi zaigu. Donostiako Kursaalen eskainiko dugu azken kontzertua: martxoaren 1ean osteguna, arratsaldeko 20:00etan. Bistan denez, ez da beste emanaldi bat gehiago izango. Berezia izango da, zentzu askotan gainera. Baina horretaz aurrerago mintzatuko gara.

Hori esateko idatzi dugu honako mezua: “Don Inorrez” bira datorren martxoaren 1ean amaituko dela, Donostiako Kursaalen. Eta dagoeneko sarrerak salgai daude. Hauxe tiketak eskuratzeko esteka zuzena.

Bide Ertzean Don Inorrez / Bira amaiera / Fin de gira / The last show
Ima Ubeda Fran Iturbe Joserra Senperena Karlos Aranzegi Joni Ubeda
2012.III.01. Kursaal, Donostia. 20:00. Tickets in: www.kutxa.net


Asteburu itzelaren ondoren, Eibarren dugu datorren hitzordua

enero 9, 2012

‎”Bizi gara, bizi gara”… Asteburu itzelaren ondoren, bizi gara! Urtarrilaren 6an Kerobiarekin batera Hatortxu Rocken aritu ondoren, oso gustura egon ginen biharamunean Andoaingo Bastero Kulturgunean. Maite dugun aretoa da Andoaingoa. Eta asteburuari amaiera ederra eman genion atzo Elgetako Espaloia Kafe Antzokian. Nahi baino gehiago luzatu zen gaua. Ondoegi zaintzen gaituzte Elgetako lagunek, besarkada bana! Ostiral honetan, Eibarren gaude, Coliseo aretoan, Mursegorekin batera 20:30etik aurrera. Gustu baduzue…

URTARRILAK 13 OSTIRALA
Coliseo aretoa, Eibar (20:30) BIDE ERTZEAN + Mursego


Bide Ertzean, “The January Sessions”

enero 2, 2012

Aupa lagunok! Hamabostaldi polita dugu aurretik. Serio demonio aritu gara entseatzen eta, orain, Bide Ertzeanekook oholtza gainera igo eta gozatu baino ez dugu egin nahi.

Hatortxun lehenbizi
Lehen kontzertua Atarrabian eskainiko dugu, Kerobiarekin batera. Era honetan, Hatortxu Rock-era itzuliko gara urtarrilaren 6an ostirala. 2008an izan ginen, Deabruekin, “1973” diskoaren aurkezpen birarekin batera. Eta beste behin itzuli ginen, 2009an, Hatortxuren 10. urtemugan. Honakoan, ordea, Bide Ertzean taldearekin goazen lehen aldia izango da eta “Badator eguna” inoiz baino ozenago abesteko gogoz bertaratuko gara. Gainera, berezia izango da. Gonbidatuak ere bidelagun izango baititugu Hatortxuko saioan: Gorka Urbizu, Naroa Gaintza, Aritz Deabruak, Toño Balerdi Balerdi… Eta keinu txiki bat egingo diogu Deabruak Teilatuetan taldeari ere.

Basteron, biharamunean
Biharamunean, urtarrilaren 7an larunbata, Andoaingo Bastero Kulturgunera itzuliko gara. Azken diskoak bertan aurkezteko aukera izan dugu eta beti bezala, oso gustura bueltatuko gara Andoaingo areto eder horretara.

Elgetako lagunak
Txintxo ibili beharko dugu Atarrabian eta Andoainen, urtarrilaren 8an Elgetarako bidea hartu behar dugulako. Areto polita Espaloia Kafe Antzokia. Aretoa bezain beste edo gehiago maite ditugu Elgetan ditugun lagunak. Aurretik izan gara, baina urtarrilaren 8an boskote moduan arituko gara lehen aldiz. Eta boskote moduan ere arituko gara gainontzeko saioetan ere.

Banpiro gaua Eibarren
Urtarrilaren 13a, viernestrece izanik ere, Mursegorekin joko dugu Eibarren. Banpiro gauarekin itxiko dugu urte hasierako biratxoa. Deabruak zaindu gaitzala egunotan!


BIDE ERTZEAN, “DON INORREZ”

URTARRILAK 6 OSTIRALA 
Hatortxu Rock, Atarrabia (22:00) + Kerobia

URTARRILAK 7 LARUNBATA
Bastero Kulturgunea, Andoain (22:00)

URTARRILAK 8 IGANDEA 
Espaloia Kafe Antzokia, Elgeta (19:00)

URTARRILAK 13 OSTIRALA
Coliseo aretoa, Eibar (20:30) + Mursego

 

PS. Mezu honen aurreko mezua abenduaren 28an argitaratu genuen. Nahikoa pista ez bada hori, badaezpada esango dugu: ez dela benetakoa bertan esaten dena…


Deabruak Teilatuetan, berriz ere estudioan

diciembre 28, 2011


Gabonetako tartea aprobetxatuz, deabruak teilatuetan taldeko kideak berriz elkartu dira. Non eta Garate estudioetan. Gabonetako kantuz osaturiko disko bat grabatzen ari dira egunotan. Tolosako laukotearentzat, hauxe izango da bertsioz osaturiko lehen diskoa. Presarik gabe ari dira grabatzen eta 2012ko udazkenean emango dute argitara. Autoekoizpena izango da baina diskoaren irabazi guztiak 1512 fundazioarentzat izango dira.

Gonbidatuak ere izango dira. Hauek dira egunotan estudiotik igaroko direnak:

“Ai au gauaren zoragarria”, Gu ta gutarrakekin

“Abenduko hilaren 24ean”, Jupiter Jon taldekoekin

“Ale Ken” (Alaken cover), Giorgio Bassmattirekin

“Trakatran 3 errege”, Tric3ps taldearekin

“Dios te salbe”, Evaristo Gatillazorekin

“Horra Mari Domingol”, Peiremans+ taldekoekin

“Pim pam pum” (Din dan don cover), Etsaiak taldekoekin

Berri gehiago laster.

Irudian, Aritz ahotsak grabatzen.


Bostak berriro taula gainean, urte berrian

diciembre 18, 2011

Bide Ertzean

Beran, Eskoriatzan, Lazkaon,… azken emanaldietan Bide Ertzean Trio modura aritu ondoren hurrengo hilabetean bostak berriro taulagainean arituko gara. Urtea bete da Fran Iturbe agurtu genuela, 2011ko abenduaren 16an Victoria Eugeniako emanaldi gogoangarria eskaini eta gero. Don Inorrez diskoaren aurkezpen emanaldi sortaren amaiera izan zen hura. Gauerdia atzean utzi genuen Be Bop-etik aterata elkar agurtu genuenean. “Ez dakigu noiz arte bat” modukoa izan zen. Ez dakigu noiz arte hori, nolanahi ere, ez da sekula batere dramatikoa izan guretzat. 1998an lehen bost kantuak grabatu genituenean ere, ez genekien noiz artekoa izango zen gure ibilbidea. Zalantzaz beterik ekin genion, eta dagoeneko hamahiru urte igaro dira.

Urruti dauka bizitokia Fran Iturbek, Los Angelesen hain zuzen. Urte osoa eman dugu bera gabe, Don Inorrez han eta hemen aurkezten. Hainbatetan Joserra Senperenarekin batera. Eta beste hainbatetan Bide Ertzean trio modura.

2012ko urtarrileko zuzenekoei begira, dagoeneko kantutegia prestatzen gabiltza. Halako babesa sentitzen da musika elementu gehiagorekin, Joserra eta Fran bakoitza berean maisu direnean gainera. Sendo eta ozen entzungo ditugu, ezker eskuin, Hammond B3 organoaren eta Gibson SG kitarraren hotsak. Horregatik bakarrik urte berria iristear zain gaude!

Urte olinpikoan sartuko gara. Guretzat, bestalde, data seinalatua da. Izan ere, iristear den urtean Joserra Senperena gutar egin genuela hamar beteko dira. Maite out diskoarekin hasi zuen ibilbidea gurean eta, geroztik, diskoz disko bosgarren kidean bilakatu da. Pianoa, organoa, akordeoia, sintetizadoreak, wurlitzer-a,… mundu berrian murgildu gintuen gu. Kantuak eta diskoak, zer esanik ez, edertu eta aberastu dituela argi dago.

Joserra Senperenarekin eta Fran Iturberekin lau emanaldi eskainiko ditugu urtarrilean. Hauexek data zehatzak:

2012.1.06. Atarrabia (Nafarroa), Hatortxu Rock + Kerobia. 21:30.
2012.1.07. Andoain, Bastero. 22:00.
2012.1.08. Elgeta, Espaloia. 19:00.
2012.1.13. Eibar, Coliseum + Mursego. 22:00.

Don Inorrez disko berrienaren inguruko azkenaurreko saioak direla esan genezake. Hortxe-hortxe, urte eta erdiko zikloa beteko da 2012ko martxoaren 1ean Kursaalen eskainiko dugun saioarekin. 2010eko azaroan lehen emanaldia eskaini genuen Gasteizen, eta azkena Donostian izango da. Izan ere, udaberritik aurrera lan berria prestatzeari ekingo diogu. Asmoa oraingoz, asmo hutsa da. Egun hauetan buruan eta bihotzean duguna bakarra delako: boskotean eskainiko ditugun emanaldiak. Gonbidatuta zaudete.